Stord hotell ønskjer å utvikle verksemda for å møte dagens og framtidige behov innan hotell- og konferansedrift. Sidan hotellet vart etablert i 1971 har anlegget vorte bygd ut i fleire trinn, og behovet for auka kapasitet og moderne fasilitetar har danna grunnlaget for prosjektet.
Prosjektet omfattar utarbeiding av ny reguleringsplan som legg til rette for vidare utvikling av hotellet. Arbeidet byggjer på eksisterande infrastruktur og fasilitetar, og har hatt som mål å skape gode løysingar både for hotelldrifta og for omgjevnadene. Gjennom volumstudiar, skisseprosjekt og reguleringsarbeid er det undersøkt ulike alternativ for plassering og utforming av nye bygningar og uteområde.
Ei sentral utfordring har vore å tilpasse utvidinga til eit område med etablerte bustader og idrettsanlegg i nærleiken. I planarbeidet har dialog med naboar vore viktig, og analysar av mellom anna sol- og skuggeverknader har vore nytta som grunnlag for vidare utvikling av prosjektet.
Arkitekturen er utvikla med mål om å redusere opplevinga av store bygningsvolum gjennom bevisst bruk av glasflater, materialskifte og fasadeutforming. Samstundes er eksisterande bygningsmasse vidareutvikla for å betre funksjonalitet, fleksibilitet og kontakt med omgjevnadene. Særleg er restaurant- og konferanseområda utforma for å bli meir opne og inviterande.
Den vedtekne reguleringsplanen gir grunnlag for fleire hotellrom, ny konferansesal, hotellhage, fleire parkeringsplassar og utvida restaurantfasilitetar. Prosjektet viser korleis planlegging, arkitektur og tekniske fag kan spele saman for å leggje til rette for vidare vekst og utvikling av ei etablert verksemd.
Nordplan har hatt ansvar for reguleringsplan, volumstudiar, skisseprosjekt, forprosjekt, detaljprosjektering og byggemelding. Oppdraget har omfatta arealplanlegging, konsekvensutgreiing, arkitektur, veg, VAO-rammeplan og rolla som ansvarleg søkjar.
